شكۆی كوردستان-
پارێزگاری هەولێر بە نووسراوێک داوا لە هاونیشتمانیان و سەرجەم کارمەند و فەرمانبەر و بەڕێوەبەری یەکە کارگێڕیی و فەرمانگەکانی سنووری پارێزگاکە دەکات، بە مەبەستی پیرۆزبایی سەردانی نەکەن و لەجیاتی ئەوە “فاتیحایەک بۆ رۆحی جوانەمەرگ (د.فەرسەت سۆفی) بنێرن” و مامەڵەی هاووڵاتیان راییبکرێت.
نووسینگەی پارێزگاری هەولێر ئەمڕۆ نووسراوێکی بڵاوکردەوە کە تێیدا هاتووە “بەهۆی پابەندبوون بەڕێنماییە تەندروستییەکان و رێکارەکانی خۆپارێزیی لەڤایرۆسی کۆرۆنا و راییکردنی مامەڵە و کاروباری هاووڵاتییان ، وێڕای سوپاس و پێزانینی زۆرمان ئاگاداری هەموو لایەک دەکەینەوە بەهیچ شێوەیەک هیچ مەراسیم و رێورەسمێک بۆ پێشوازیکردن و پیرۆزبایی بەبۆنەی دەستبەکاربوونی بەڕێز ئومێد خۆشناو بە پارێزگاری نوێی هەولێر ئەنجامنادرێت”.
لە نووسراوەکەدا داواکراوە لەبری ئەوە “دەکرێت لەشوێن و پێگەکانتانەوە پیرۆزباییەکانتان ئاراستەمان بکرێت ، داواکاری بەڕێز ئومێد خۆشناو بۆ ئێوەی بەڕێز لەجیاتی پیرۆزبایی ناردنی فاتیحایەکە بۆ رۆحی جوانەمەرگ (د.فەرسەت سۆفی) ، ئێمە سوپاستان دەکەین”.
هەروەها داوا لە سەرجەم کارمەند و فەرمانبەر و بەڕێوەبەری یەکە کارگێڕیی و فەرمانگەکانی سنووری پارێزگای هەولێر کراوە، لەبری سەردانیکردنیان بۆ دیوانی پارێزگا بەمەبەستی پیرۆزباییکردن، “ئەو زەحمەتە نەکێشن، لە ئایندەدا بەشی زۆری کارمان مەیدانی دەبێت، واتە خۆمان سەردانی سەرجەم سنوور و فەرمانگە و شوێنەکان دەکەین، لەبری ئەزیەت کێشانتان، نزای سەرکەوتن و پشتیوانی ئەرکەکەمان بن و لەپێگە و شوێنی خۆتانەوە لەجیاتی پیرۆزبایی، خەریکی ڕاییکردنی مامەڵە و کاروباری هاوڵاتییانبن سوپاستان دەکەین”.
رۆژی 8-2-2021 ئومێد خۆشناو لەلایەن ئەنجوومەنی پارێزگای هەولێرەوە وەک پارێزگاری نوێی دەستنیشانکرا. رۆژی پێنجشەممە 18-2-2021 نێچیرڤان بارزانی، سەرۆکی هەرێمی کوردستان فەرمانی هەرێمی بۆ دەستبەکاربوونی واژۆکرد و، هیوای سەرکەوتنی بۆخواست و رایگەیاند “ئەرکى پارێزگارى ههولێر قورسه، بهتايبهتى لهم دۆخهدا كه كۆمهڵێك كێشه و قهيران رووبهڕووى ههرێمى كوردستان بوونهتهوه.” لە رێوڕەسمەکەدا کە رێبەر ئەحمەد، وەزیرى ناوخۆی هەرێمی کوردستان ئامادەی بوو، پارێزگارى نوێی هەولێر لەبەردەم نێچیرڤان بارزانی، سەرۆکى هەرێمى کوردستان، سوێندى یاسایى خوارد.