ڕۆژنامەکوردستانی

پۆلیس لەبارە دۆزینەوەی دو تەرم رونكردنەوە دەدات

شكۆی كوردستان-

وتەبێژی بەڕێوەبەرایەتی پۆلیسی ھەڵەبجە رایگەیاند، دوای ئەوەی کاتژمێر 6:00ی بەرەبەیانی ئەمڕۆ ئاگادارکراونەتەوە لەبونی دو تەرم لەناو ماڵێکی گەڕەکی شارەوانی شارەکە، لە لێکۆڵێنەوە سەرەتاییەکاندا دەرکەوەتوە ئەو دو کەسە بە دو چەک کەلەناو ماڵەکەدا بون کوژراون و تائێستا نازانرێت روداوەکە لەسەر چی بوە.

هەردو کەسەکە بەچەک کوژراون و ئاسەواری فیشەک لەسەر جەستەیان هەیە

رائید بەرزان عوسمان، وتەبێژی بەڕێوەبەرایەتی پۆلیسی ھەڵەبجە بە خەندان-ی راگەیاند، “کاتژمێر 6:00ی بەرەبەیانی ئەمڕۆ ئاگادارکراینەوە لە دۆزینەوەی دو تەرم لەگەڕەکی شارەوانی، دوای گەیشتنی تیمەکانی لێکۆڵینەوە تاوان بۆمان دەرکەوت کە ئەو دو کەسە خەڵکی پارێزگای هەڵەبجەن و یەکێکیان تەمەنی 41 ساڵە و ئەوی دیکەشیان تەمەنی 21 ساڵە، هەردو کەسەکە بەچەک کوژراون و ئاسەواری فیشەک لەسەر جەستەیان هەیە”.

 ناتوانین بڵێین لەسەر  قەرزداری یان کێشەی کۆمەڵایەتی کوژراون 

پەیوەست بەهۆکاری کوژرانی ئەو دو کەسەش کەدەوترێت کێشەکە پەیوەندی بە قەرزدارییەوە هەیە باسی لەوەکرد، “ئێمە ناتوانین بڵێین لەسەر  قەرزداری یان کێشەی کۆمەڵایەتی یان کێشەیەکی دیکە کوژراون، لەئێستادا دو کەس کوژراون و ئێمە لێکۆڵینەوە لەروداوەکە دەکەین، هەرکاتێک تۆمەتباران دۆزرانەوە زانیاری تەواو لەبارەی روداوەکە بۆ رایگشتی رادەگەیەنین”.

دو چەکی لێبوە و هەردو چەکەکەش تەقەی پێکراوە

وتەبێژی بەڕێوەبەرایەتی پۆلیسی ھەڵەبجە ئەوەشی خستەڕو، لەناو ئەو ماڵەدا دو چەکی لێبوە و هەردو چەکەکەش تەقەی پێکراوە، لەئێستادا هەردو چەکەکە رەوانەی بەڵگەی تاوان کراون و “بەگوێرەی ئەو سەرەداوانەی لەبەردەستمانە ئیشەڵا بەم زوانە تۆمەتباران دەستگیردەکرێن”.

بینینی زیاتر
Back to top button
Close