شكۆی كوردستان-
پارتی دیموكراتی كوردستان، دیاریكردنی سه‌رۆكی فراكسیۆنه‌كه‌ی له په‌رله‌مانی كوردستان یه‌كلاده‌كاته‌وه و سبه‌ی چوارشه‌ممه‌ش، ئومێد خۆشناو دوا كۆبونه‌وه ئه‌نجامده‌دات.
پێشه‌وا هه‌ورامانی، وته‌بێژی فراكسیۆنی پارتی له په‌رله‌مانی كوردستان، به خه‌ندان-ی راگه‌یاند، سبه‌ی چوارشه‌ممه، فراكسیۆنی پارتی دوا كۆبونه‌وه‌ی خۆی به‌سه‌رۆكایه‌تی ئومێد خۆشناو ئه‌نجامده‌دات، وه‌ك دانیشتنێكی ماڵئاوایی ده‌بێت بۆ كاك ئومێد، هه‌روه‌ها گفتوگوگۆ له‌باره‌ی دیاریكردنی سه‌رۆكێكی نوێ بۆ فراكسیۆن ده‌كرێت.
كاروباری حزبی خۆمانه و به‌ره‌چاوكردنی بۆچون و گفتوگۆكان كه‌سێك وه‌ك سه‌رۆكی نوێی فراكسیۆن دیاریده‌كرێت
سه‌باره‌ت به‌دیاریكردنی په‌رله‌مانتارێك به سه‌رۆكی فراكسیۆنی پارتی، پێشه‌وا هه‌ورامانی ره‌تیكرده‌وه، هیچ كه‌سێك دیاریكرابێت و وتیشی، “كاروباری حزبی خۆمانه و به‌ره‌چاوكردنی بۆچون و گفتوگۆكان كه‌سێك وه‌ك سه‌رۆكی نوێی فراكسیۆن دیاریده‌كرێت”.
ئومێد خۆشناو سه‌رۆكی فراكسیۆنی پارتی له په‌رله‌مانی كوردستان، دوێنێ سێشه‌ممه، وه‌ك پارێزگاری نوێی هه‌ولێر متمانه‌ی پێدرا و سوێندی یاسایی خوارد.
فراكسیۆنی پارتی دیموكراتی كوردستان خاوه‌نی 45 (چل و پێنج) كورسی په‌رله‌مانیه و پۆستی جێگری سه‌رۆكی په‌رله‌مانی كوردستانی وه‌رگرتوه.
