شكۆی كوردستان-
نوسینگەی بودجە لە کۆنگرێسی ئەمریکا رایگەیاند، ئەو قەرزەی کە حکومەتی فیدراڵی وەریدەگرێت تا ساڵی 2050 دەکاتە 195% بەرهەمهێنانی وڵات، هەر لەمساڵدا قەبارەی قەرزی حکومەت بە رێژەی 79% زیادیکردوە.
نوسینگەی بودجەی کۆنگرێسی ئەمریکا لەراپۆرتی ساڵانەی خۆیدا بڵاویکردەوە، بڵاوبونەوەی ڤایرۆسی کۆرۆنا خەرجییەکانی حکومەتی فیدڕاڵی زیادیکردوە، ئەمەش چەرخی گەشەسەندنی بازاڕەکانی وڵاتەکەی وەستاندوە و وڵات توشی کورتهێنان بوە و قەرزەکانی لەسەر کەڵەکەبوە.
ئاماژەی بەوەشکرد، بەپێی پێشبینەکان کورتهێنانی بودجەی ئەمساڵی ئەمریکا دەگاتە رێژەی 16%، بەهۆی زۆربونی خەرجییەکانی مسۆگەرکردنی ژیانی کۆمەڵایەتی و چاودێری تەندروستی.
هەر بە گوێرەی ئەو راپۆرتە، ئەو قەرزەی کە حکومەتی فیدراڵی وەریدەگرێت تا ساڵی 2050 دەکاتە 195% بەرهەمهێنانی وڵات.
بۆ ئەوەی ئاسایشی دارایی وڵاتێک پارێزراو بێت، پێویستە بڕی قەرزی وڵاتەکە لە 60%ی قەبارەی بەرهەمهێنانی وڵاتەکە زیاتر نەبێت، بەڵام لە ئێستادا ئەو رێژەیە لە ئەمریکا بۆ 79% بەرزبوەتەوە، ئەوەش مەترسی سەرهەڵدانی قەیرانێکی ئابوری گەورەی لە وڵاتەکەدا دروستکردوە.
سەرەتای ئەم مانگەش وەزارەتی گەنجینەی ئەمریکا رایگەیاند، بەهۆی پەتای کۆڤید-19، کورتهێنانی بودجەی حکومەت لە ویلایەتە یەکگرتوەکانی ئەمریکا گەیشتوەتە زیاتر لە سێ ترلیۆن دۆلار.
