کوردستانی

عه‌لی حه‌مه‌ساڵح: سیستمێكی تۆماركردنی تیژڕه‌ویی مه‌ترسیدار له‌سلێمانی جێگیرده‌كرێت

شكۆی كوردستان-

عەلی حەمە ساڵح، ئەندامی پەرلەمانی کوردستان رایگەیاند، بەگوێرەی گرێبەستی نێوان حکومەتی هەرێم و ئەو کۆمپانیایەی بەرپرسە لە دانان و چاودێریکردنی کامێرای تیژڕەوی لە سلێمانی “مانگانە خەڵک چەند سزا بدرێت، خەڵکیش نەچێت پارەکە بدات، دەبێت لە داهاتی سلێمانی حکومەت پارەی ئەو کۆمپانیایە بدات”، ئەوەش وەک مەترسییەک لەسەر داهاتی سلێمانی ناودەبات.

لە ئێستادا ئەو گرێبەستە تەنیا بۆ سنوری ئیدارەی سلێمانییە

عەلی حەمە ساڵح لە پەیجی تایبەتی خۆی لە فەیسبوک ئاماژەی بەوەشکردوە، “ئەم کۆمپانیایە دەڵێ: (53 ملیار دینار) خەرجدەکەم لە دانانی 225 کامێرای دیاریکردنی تیژڕەوی لە سنوری ئیدارەی سلێمانی، هەڵەبجە، ڕاپەڕین و گەرمیان بە سیتمی پۆینت تو پۆینت، واتە: نێوانی کامێراکانیش هەر کامێرایە!.. لەم سنورەدا 545 هەزار ئۆتۆمبێل هەیەو مانگی جارێک بەتێکڕا غرامەی بەربکەوێت 38 ملیار داهات دەکات.. کۆمپانیا 70%ی داهات دەبات تاوەکو پارەی خۆی وەردەگرێت، دواتر تاوەکو 15 ساڵ 20% داهات دەبات، لە ئێستاشدا ئەو گرێبەستە تەنیا بۆ سنوری ئیدارەی سلێمانییە”.

 لەسەر حسابی سلێمانی، ئۆتۆمبێل بۆ هەمو شارەکان دەکڕدرێت

ئاماژەی بەوەشکردوە، “ئەم برادەرانەی سلێمانی زۆر هەوڵیانداوە ڕەزامەندی حکومەت و وەزارەتی ناوخۆ بەدەست بهێنن، ئەوانیش ڕەزامەند بون لەبەرامبەردا (403 ئۆتۆمبێل)ی سفر کیلۆمەتر بکڕدرێ بۆ سلێمانی، هەولێرو دهۆک.. واتە: لەسەر حسابی داهات و گیرفانی خەڵکی سلێمانی، دەبێت ئۆتۆمبێل بۆ وەزارەتی ناوخۆ لە هەمو شارەکان بکڕدڕێت ( ئەمەش دۆخی خەڵکی سلێمانی)”.

عەلی حەمە ساڵح دەڵێت، “بەپێی خاڵی هەشتەم لە گرێبەست، مانگانە خەڵک چەند سزا بدرێت، خەڵکیش نەچێت پارەکە بدات، دەبێت لە داهاتی سلێمانی حکومەت پارەی ئەو کۆمپانیایە بدات، واتە: ئەگەر لە مانگێک بە بەهای 30 ملیار دینار سزای خەڵک درابێت.. پشکی کۆمپانیا 21 ملیار دینارە! ئەگەر خەڵک نەچو مامەڵە بکات و پاش سزاکە ڕاستەوخۆ پارە بدات، دەبێت حکومەتی هەرێم لە داهاتی سلێمانی ئەو 21 ملیار دینارە بدات! حاڵی موچەو دەرمان و خزمەتگوزاری لەم سنورە زۆر جوانە بەهۆی ئەوەی دەڵێن: داهات نیە! با ئەمەشی بێتە سەر!”.

بینینی زیاتر

بابەتی هاوشێوە

Back to top button
Close