کوردستانی

ئاسایشی سلێمانی ده‌ستگیركردنی گه‌وره‌ تیرۆرستێكی سه‌ربه‌ داعشی راگه‌یاند

شكۆی كوردستان-

بەڕێوەبەرایەتی ئاسایشی ڕۆژئاوای سلێمانی رایگەیاند، رۆژی 14ی ئەم مانگە هێزەکانیان لە ناوچەی گۆپاڵەی سنوری پارێزگای سلێمانی، چەکدارێکی داعشیان دەستگیرکردوە کە پێشوتر خۆی و سێ کوڕی دیکەی پەیوەندییان بە ریزەکانی ئەو رێکخراوەوە کردوە، لەئێستاشدا ئەو چەکدارە ڕاگیراوەو لێکۆڵینەوە لەوبارەیەوە بەردەوامە.

تیرۆرست (ح ، ج ، م )  لەشارۆچکەی گۆپاڵە دەستگیرکرا

بەڕێوەبەرایەتی ئاسایشی ڕۆژئاوای سلێمانی ئەمڕۆ یەکشەممە لە راگەیەنراوێکدا باسی لەوەشکردوە، “لەسەر بنەمای هەبونی زانیاری وردی پێشوەختەی هێزەکانمان لەبەڕێوەبەرایەتی ئاسایشی ڕۆژئاوای سلێمانی پاش وەرگرتنی ڕەزامەندی بەڕێز دادوەری دادگەی لێکۆڵینەوە، تیرۆرست (ح ، ج ، م ) کە باوکی تیرۆرست (ع ، ح، ج ) ناسراو بە (عبود) کەلەگرتەیەکی ڤیدۆیدا لەساڵی (2015) لەگەڵ گەورە تیرۆرست مەلا (شوان ) دەرکەوتو بەئۆتۆمبێلێکی جۆری فۆردی بۆمبڕێژکراو  ناردی خۆی تەقاندەوە بەهێزەکانی پێشمەرگەدا، لەئۆپراسیۆنێکی تایبەتدا لەلایەن هێزەکانمان لەبەڕێوەبەرایەتی ئاسایشی ڕۆژئاوای سلێمانی لە (14 /9 /2022) لەشارۆچکەی گۆپاڵە دەستگیرکرا”.

ساڵی (2005) پەیوەندی بەگروپی تیرۆرستی قاعیدەوە کردوە

ئەوەش هاتوە “تیرۆرست (ح ، ج ، م) لەبنەڕەتدا خەڵکی پارێزگای (صلاح الدین) قەزای شەرگاتە لەساڵی (2005) پەیوەندی بەگروپی تیرۆرستی قاعیدەوە کردوەو کاری شاردنەوەی چەک و ئامادەکردنی تێنتی بۆ تەقاندنەوەیان بەهێزەکانی هاپەیمانان کردوە، لەساڵی (2014)شەوە لەگەڵ دروستبونی داعش و گەیشتنیان بە قەزای شەرگات خۆی و (2) کوڕی بەناوەکانی (١- ع ، ح  ۲- ب ،ح   ٣- م ، ح ) پەیوەندی دەکەن بەداعشەوەو دەبنە چەکداری داعش”.

تاوەکو کاتی دەستگیرکردنی (7) شوێن دەگۆڕێت

بەڕێوەبەرایەتی ئاسایشی ڕۆژئاوای سلێمانی ئەوەشی خستوەتەڕو، “ئەو چەکدارانە پاش ڕوخانی داعش لە( صلاح الدین) هەڵدێن و دەچنە  (موصڵ) پاش ڕوخانی داعش لە(موصڵ) ناوبراو دەچێتە وڵاتی سوریا لە (دیرالزور) نیشتە جێ دەبێت، پاشان دەچێتە وڵاتی تورکیاو لەساڵی (2020) دەگەڕێتەوە عێراق و ڕودەکاتە هەرێمی کوردستان لەپارێزگای سلێمانی خۆی حەشاردەدات، تاوەکو کاتی دەستگیرکردنی (7) شوێن دەگۆڕێت”. 

عبود لەکردەوەیەکی تیرۆرستیدا خۆی تەقاندەوە بەهێزەکانی پێشمەرگەداو  کوژرا

ئاسایشی ڕۆژئاوای سلێمانی ناوی (ح ، ج ، م)ـی بڵاوکردوەتەوە و ئاماژەی بەوەداوە، “تیرۆرست (ع ، ح )ناسراو بە(عبود) لەکردەوەیەکی تیرۆرستیدا خۆی تەقاندەوە بەهێزەکانی پێشمەرگەداو  کوژرا، هەروەها تیرۆرست (ب ، ح ) لە (موصڵ ) بەبۆردومانی فڕۆکەی جەنگی کوژرا و تیرۆرست ( م ،ح ) پاش ڕوخانی داعش لە عێراق و سوریا هەڵدێ و دەچێتە تورکیا  لەوێ نیشتەجێیە، لەئێستاشدا بەبڕیاری بەڕێز دادوەری دادگەی لێکۆڵینەوە بەپێی ماددەی (2) ی تێرۆر ڕاگیراوەو لێکۆڵینەوە لەوبارەیەوە بەردەوامە”.

بینینی زیاتر

بابەتی هاوشێوە

Back to top button
Close