شکۆی کوردستان-
پارێزگاری سلێمانی ڕایدەگەیەنێت، قەوارەی هەرێم لەبەردەم مەترسیەکی جدیدایە و پاراستنی ئەو قەوارەیە ئەرکی سەرشانی هەمومانە.
د.هەڤاڵ ئەبوبەکر پارێزگاری سلێمانی لە لێدوانێکیدا بۆ دەنگی ئەمریکا رایگەیاند، لە ئێستادا قەوارەی هەرێمی کوردستان کەوتوەتە بەردەم مەترسی هەڵوەشاندنەوە و پێویستە پارێزگاری لێبکرێت.
دەشڵێت، پاراستنی قەوارەی هەرێم بە مانای پاراستنی پارتی و یەکێتی نایەت بەڵکو پاراستنی خۆمان و وڵات و شە‌هیدەکانمانە.
بەوتەی پارێزگاری سلێمانی، مانەوەی قەوارەی هەرێم لە حزب و سەرکردە گەورەترە و پێویستی بە بەرنامەیەکی نیشتیمانی هەیە.
ئاماژەی بەوەشکرد، بە دەوڵەتانی ناوچەکەمان وتوە، گەر پێتانوابێت سود لە خاکی هەرێم وەرگیراوە بۆ هێرشکردنە سەرتان، ئێوەش کوردستانتان کردوەتە گۆڕەپانێک بۆ یەکلایی کردنەوەی ئەجێندا ئەمنی و سەربازییەکانتان.
هەڤاڵ ئەبوبەکر وتیشی:” کورد نابێت ببێتە داش و دەستکەلای هیچ لایەک، دەبێت خۆی بپارێزێت و پەند لە سەدەی ڕابردو وەربگرێت”.
