بەگوێرەی راگەیاندنەكان، پێشنیوەڕۆی ئەمڕۆ، ژان لۆدریان، وەزیری دەرەوەی فرەنسا دەگاتە بەغداد و لەگەڵ سەرۆك كۆماری عێراق و سەرۆكوەزیران و ژمارەیەك لە بەرپرسانی دیكەی عێراق کۆببێتەوە و دواتریش دێتە هەرێمی كوردستان.
وەزارەتی دەرەوەی عێراق كارنامەی سەردانەكەی وەزیری دەرەوەی فڕەنسای بڵاوكردۆتەوە و تێیدا هاتوە، بڕیارە پێشنیوەڕۆی ئەمڕۆ، ژان لۆدریان، وەزیری دەرەوەی فرەنسا بگاتە بەغداد.
لەگەڵ هەریەك لە د. بەرهەم ساڵح، سەرۆك كۆماری عێراق و مستەفا كازمی، سەرۆكوەزیرانی عێراق و فوئاد حوسێن، وەزیری دەرەوەی عێراق كۆدەبێتەوە
لە سەردانەكەدا وەزیری دەرەوەی فرەنسا لەگەڵ هەریەك لە د. بەرهەم ساڵح، سەرۆك كۆماری عێراق و مستەفا كازمی، سەرۆكوەزیرانی عێراق و فوئاد حوسێن، وەزیری دەرەوەی عێراق و جینین پلاسخارت، نوێنەری نەتەوەیەکگرتوەکان لە عێراق کۆدەبێتەوە.
بڕیارە لە سەردانەكەی، وەزیری دەرەوەی فرەنسادا، هاریكاری و هەماهەنگییەكانی نێوان پاریس و بەغداد تاوتوێبكرێت و چۆنیەتی گەشەپێدان و فراوانكردنی پەیوەندییەكانی نێوان هەردو وڵات باس بكرێت.
هەر بەگوێرەی میدیاكانی عێراق، دوای كۆتاییهاتنی كۆبونەوەكانی، لۆدریان سەردانی هەرێمی كوردستان دەكات و لەگەڵ بەرپرسانی هەرێم و چەند كەسایەتییەكی سیاسی كورد كۆدەبێتەوە.
