شكۆی كوردستان-
سەرۆکایەتی ئیدارەی کارەسات و باری لەناکاوی تورکیا (AFAD) رایگەیاند، 40 هەزار و 642 کەس لە بومەلەرزەکەی 6ی ئەم مانگەدا لە تورکیا و باکوری کوردستان گیانیان لەدەستداوە، کە سەنتەرەکەی کەهرامان مەرەش بو.
سەرۆکایەتی ئیدارەی کارەسات و باری لەناکاوی تورکیا (AFAD) ئەمڕۆ شەممە نوێترین ئاماری بومەلەرزەکەی بڵاوکردەوە و بەگوێرەی ئامارەکەش، هەریەکە لە پارێزگەکانی کەهرامان مەرەش، غازی عەنتاب، شانلیورفا، دیاربەکر، ئەدەنە، ئادیەمان، عوسمانییە، هەتای، کیلیس، مەلاتیا و ئێلازیغی گرتەوە و بەهۆیەوە 40 هەزار و 642 کەس گیانیان لەدەستداوە.
108 هەزار و 68 کەس بەهۆی بومەلەرزەکەوە برینداربون
ئاماژەی بەوەشکردوە، 108 هەزار و 68 کەس بەهۆی بومەلەرزەکەوە برینداربون، 216 هەزار و 347 کەسیش ڕزگاریان بوە و ناوچە زیانلێکەوتوەکانی بومەلەرزەکە چۆڵکراون.
چوار هەزار و 323 بومەلەرزەی دیکە تۆمارکراون
باسی لەوەشکردوە، لە 6ی ئەم مانگەوە تا ئەمڕۆ، چوار هەزار و 323 بومەلەرزەی دیکە بەگوڕی جیاواز لە کەهرەمان مەڕەش تۆمارکراون.
253 هەزار و 16 کەس بەردەوامن لەگەڕان
ئەوەشخراوەتەڕو، 253 هەزار و 16 کەس لە گەڕان و فریاگوزاری لە ئافاد، PAK JAK، JÖAK، DİSAK، پاسەوانی کەناراوەکان، داک، گیوڤەن، تیمەکانی ئاگرکوژێنەوە، فریاگوزاری، MEB، ڕێکخراوە ناحکومییەکان و تیمە نێودەوڵەتییەکان هێشتا لە ناوچەکەدا کاردەکەن.
سەرۆکایەتی ئیدارەی کارەسات و باری لەناکاوی تورکیا باسی لەوەشکردوە، ژمارەی کارمەندانی گەڕان و فریاگوزاری کە لە وڵاتانی دیکەوە چونەتە ئەو شوێنانەی بومەلەرزەکە گرتویەتیەوە11 هەزار و 488 کەسن.
سەبارەت بەهاوکاریەکانیش، ئاماژەی بەوەکردوە، “172 هەزار خێمە بۆ زیانلێکەوتوان لەناوچەکانی بومەلەرزە بۆ ئەو کەسانە دابینکراوە کە باڵەخانە و خانوەکانیان داڕوخاون و زیانیان پێگەیشتوە”.